Аввал хабар қилганимиздек, жорий йилнинг 7-16 ноябрь кунлари Қозоғистоннинг Алмати шаҳрида оғир атлетика бўйича катталар ўртасида жаҳон чемпионати баҳслари ўтказилди.
Дунёнинг 72 давлати вакиллари иштирокида ўтказилган мазкур нуфузли мусобақада жаҳоннинг бугунги кундаги энг кучли оғир атлетикачилари аниқланиши билан бирга, 2016 йили Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларининг йўлланмалари учун дастлабки очколар ҳам ўйналди.
Шу ўринда таъкидлаш жоизки, оғир атлетика спорт турида Олимпиада ўйинларига йўлланмалар спортчиларнинг Жаҳон ва қитъа чемпионатларида кўрсатган натижаларининг умумий кўрсаткичига кўра терма жамоаларга берилади. Жумладан, 2016 йилги Олимпиада ўйинларининг йўлланмалари учун очколар 2014-2015 йилларда ўтказиладиган жаҳон чемпионатлари ва қитъа чемпионатларида эришилган натижаларнинг якунларига кўра берилади.
Эътиборлиси, Алматида бўлиб ўтган жаҳон чемпионатида эркаклар терма жамоамиз 1 та олтин, 2 та кумуш ва 1 та бронза медалини қўлга киритиб, умумжамоа ҳисобида 7-ўринни, очколар бўйича эса 9-ўринни эгалладилар (эркаклар ўртасидаги мусобақада 52 давлат вакили иштирок этган) ва Олимпиада ўйинларининг 5 та лицензиясини деярли нақд қилиб қўйишди. Аёллар терма жамоамиз эса очколар ҳисобида 10-ўринни эгаллаб (аёллар мусобақасида 47 давлат вакили қатнашди) 3 та йўлланмага эга бўлдилар.
“Албатта, оғир атлетикачиларимизнинг эришган натижалари ҳар қанча тахсинга лойиқ – дейди Ўзбекистон миллий олимпия қўмитаси бошқарма бошлиғи Рашид Маткаримов. Агарда ҳамюртларимиз 2015 йили АҚШда ўтказиладиган навбатдаги жаҳон чемпионатида бунданда яхши кўрсаткичга эришсалар, йўлланмаларимиз сони яна биттага ошиши мумкин. Аксинча, океан ортида ўтказиладиган жаҳон чемпионатида Алматида эришилган натижалардан паст кўрсаткичлар қайд этилган тақдирда ҳам йўлланмаларимиз сони нари борса 8 тадан 7 тага тушиши мумкин. Нима бўлган тақдирда ҳам оғир атлетикачиларимиз 2016 йилги Олимпиада ўйинларида қатнашишлари аниқ бўлди”.
Терма жамоамиз муваффақиятига Руслан Нурудинов (-105 кг.), Улуғбек Алимов (-85 кг), Иван Ефремов (+105 кг), Сардорбек Дўстмуродов (-105 кг), Достон Ёқубов (-69 кг), Муҳаммад Бегалиев (-85 кг), Адҳамжон Эргашев (-62 кг), Марина Сисоева (-53 кг), Маҳлиё Тоғаева (-48 кг), Манзура Мамасолиева (-69 кг), Фарангиз Шомуродова (-58 кг) ва Лола Қодирова (-48 кг) ҳисса қўшдилар.
Жаҳон чемпиони Руслан Нурудинов даст кўтаришда 193 кг. натижа билан олтин, силтаб кўтаришда 239 кг. натижа билан бронза, иккикураш якунларига кўра эса 432 кг. натижа билан кумуш медаль совриндори бўлди. Шу ўринда таъкидлаш керакки, Руслан Нурудиновнинг Алмати шаҳрида қайд этган натижаси билан ўзининг шахсий рекордини ҳам янгилади. Ёдингизда бўлса, 2013 йили Польшада бўлиб ўтган жаҳон чемпионатида олтин медалга сазовор бўлган Руслан, иккикураш якунларига кўра 425 кг. (даст кўтаришда 190 кг., силтаб кўтаришда 235 кг.) натижани қайд этган эди.
Терма жамоамиз ҳисобига яна бир кумуш медални Улуғбек Алимов силтаб кўтариш мусобақасида 213 кг. тошни ўзига бўйсинтирган ҳолда қўлга киритди.
Алмати шаҳрида ўтказилган Жаҳон чемпионатида Ватанимиз шарафини муносиб ҳимоя қилган ҳамюртларимиз бугун Тошкент вақти билан соат 18:20да юртимизга қайтиб келадилар.
