Афсонавий футболчи Пеленинг ўғли Эдиньо номи билан танилган Эдсон Шолби Насименту Бразилия ҳукумати томонидан ҳибсга олинди. У ноқонуний пулларни қонунийлаштиришда айбланганди. Унинг апелляцияси рад этилди. Бу ҳақда euro-football.ru сайти маҳаллий ОАВга таяниб хабар бермоқда.

Эдиньо наркотиклар сотувидан тушган пулларни қонунийлаштиришга уринганлиги учун май ойида 33 йил қамоққа ҳукм қилинганди, бироқ унинг адвокатлари ҳукмига норозилик шикоятини беришганди. Апелляция кўриб чиқилаётган вақтда айбланувчи озодликда юрганди.

Ушбу иш бўйича текширувлар 2005 йилда бошланган. Эдиньо машҳур нарко сотувчилар билан бирга ишлаганликда айбланган. Унинг ўзи бу айбловларни бутунлай рад этмоқда ва фақат наркотиклар қабул қилганини тан олди.

Эдиньодан ташқари яна уч шахс бундай оғир жазога тортилди. Суд уларнинг барча бойликларини, жумладан 100га яқин автомобилни мусодара қилди.

Эдиньо 90-йилларда “Сантос”да ўйнаган. Айни вақтда у клуб мураббийларидан бири ҳисобланади.