Клаудиа Романи исми сўнгги пайтларда миллионлар ўйини ишқибозлари орасида анчагина танилиб улгурди. Ҳа, яшил майдонда футбол ўйинларини бошқаришга даъвогарлик қилаётган бу соҳибжамол айни дамда актриса ҳамда модельер ҳамдир. «Ilveromilanista.it» футбол ишқибозларига танилиб улгурган Романи билан қисқа интервью уюштирди. Қуйида ана шу интервьюни эътиборингизга ҳавола этамиз.
— Клаудиа, суҳбатимизни одатий савол билан бошласак. Сизда «Милан»га бўлган қизиқиш қандай уйғонган?
— Ҳаммаси жуда оддий ва ҳаяжонли, мен болалигимданоқ бу жамоага меҳр қўйганман. Ҳатто бувам мени «Мальдиниста» деб чақирарди.
— Кўпинча қизил-қора футболкада юрасиз. Бу ишингизга боғлиқми ёки «Милан» мухлисаси бўлганингиз учун айнан шу стилни танлаганмисиз?
— Ҳамма фотосессиямда шундай либосда намоён бўламан ва бу менинг шахсий ғоям. Бундай кўриниш, яъни эгнимдаги «Милан» формаси жамоани қўллаб-қувватлаш мақсадида танланган. Умуман олганда, жамоа формаси мен учун энг муҳим либослардан бири саналади?
— Клуб сафидаги қайси футболчини алоҳида кўрсатган бўлардингиз?
— Ўйлашимча, бу мавсумда «Милан»да Стефан аш-Шаъравий порлаб чиқиши керак. Унга ёш футболчи сифатида қарамаган бўлардим, чунки Стефан аллақачон анча ишларни бажариб бўлди. У «Милан»да яхши яшаяпти, ўйлайманки, кейинчалик натижалари ҳам шунга яраша бўлади.
— Бу мавсумда қандай натижа кутяпсиз? Сизнингча, жамоада нималар ўзгариши керак?
— Мен олдин ҳам айтганман, «Милан» ҳар доим юқори ўринларга даъвогарлик қилиши шарт, бунинг учун эса, ўйлашимча, таркибни кучайтириш керак. Ахир нафақат Италияда, балки Европада ҳам рақобат жуда кучли.
— Агар «Милан» Скудеттони қўлга киритса, буни қандай қилиб нишонлашга ваъда берасиз?
— Шу лаҳзаларни интиқлик билан кутяпман. Мен чемпионлик учун махсус фотосессия яратардим. Қолаверса, мени «Сан Сиро»га таклиф қилишларини истардим, ўшанда йигитларни ҳар томонлама қўллаб-қувватлардим.
Қисқача маълумотлар:
Туғилган санаси: 1982 йил 14 апрель
Туғилган жойи: Аквила, Италия
2010 йилдан бери Майами (Флорида)да яшайди.
ЛОЧИНБЕК таржимаси.
