Айни пайтда Москвада хизмат сафари билан бўлиб турган "Пахтакор" менежери ОФКнинг ОЧЛ ўринлар тақсимоти бўйича қарорига изоҳ билдирди.
"ОФКнинг ушбу қарори футболимиз учун жуда ижобий ва фойдали. Ўйлашимча, халқаро мусобақаларда клубларимиз қанчалик кўп ўйнаса, бу футболимиз учун шунчалик яхши бўлади. Ҳозир хизмат сафари билан Москвада бўлиб турибман ва бугун "Локомотив" "Спартак" учрашувига ташриф буюриб, кўплаб мутахассислар билан кўришдим. Тажриба алмашиш ҳар бир мураббий учун жуда муҳим. Тез орада янги мавсум бошланади ва "Пахтакор"ни Чемпионлар лигасида янги синов кутмоқда. Биз жамоа билан биргаликда ОФКнинг ушбу қарори хато бўлмаганини исботлашга уринамиз ва футболимиз савияси ўсиб бораётганини кўрсатишга ҳаракат қиламиз. "Пахтакор"нинг ҳар бир футболчиси майдонга нафақат клуб, балки ўзбек футболи шарафини ҳимоя қилиш учун тушади", - дейди Самвел Бабаян "Пахтакор" расмий сайтига берган интервьюсида.
