"Пахтакор" иқтидорли ҳужумчи Наврўз Олимов билан шартнома имзолади.
Охирги мавсумларда "Қизилқум"даги ўйинлари орқали миллий терма жамоага жалб этилган ҳужумчи Наврўз Олимов фаолиятини "Пахтакор"да давом эттирадиган бўлди. Терма жамоа сафида Дубайга жўнаб кетиши олдидан клуб ва Олимов ўртасида шартнома тузилди.

Ушбу ўтиш тўғрисида клуб менежери Самвел Бабаян қуйидаги фикрларни билдирди:
- "Пахтакор" селекция хизмати ҳамиша юртимиздаги иқтидорли футболчиларни кузатиб, улар ҳақида маълумотларни тўплаб келади. Наврўз Олимовни "Қизилқум" ёшлари таркибида ўйнаб юрганидан бери кузатиб келганмиз. Олий лига беллашувларида яхши таассурот қолдирган Олимов "Пахтакор"нинг шундоқ ҳам кучли бўлган ҳужум чизиғида рақобатни янада ошириши табиий. Ўзим ҳам ушбу ҳужумчининг ўйинларини анчадан бери кузатиб келаман. У жамоамизда юқори савиядаги ҳужумчига айланиб, совринларга эга чиқади деб умид қиламан.

Наврўз Олимов
Туғилган санаси: 21.03.1992
Олий лигада 32 учрашувда 4 тўп киритган. Миллий терма жамоада 8 ўйинда 1 гол муаллифи бўлган.