Тошкентда бўлиб ўтаётган футзал бўйича халқаро "Tashkent Cup-2014" мусобақасида бугун иккинчи тур ўйинлари ўтказилади. Ўзбекистон терма жамоаси Қозоғистон билан баҳс олиб боради. Қўшниларимизнинг бразилиялик бош мураббийи Какау ўйин олдидан ўз фикрларини билдириб ўтди.

"Ўзбекистон ўз уйида, ўз мухлислари қаршисидан ўйнамоқда. Ўзбекистон ва Қозоғистон ўртасидаги ўйин дерби эканини биламан, худди Бразилия-Аргентина каби. Умуман олганда, кучли рақибларга қарши ўйинда таркибни синовдан ўтказиб олиш имкониятига эга бўлаётганимдан хурсандман.

Биз ушбу мусобақада ғалаба қозонишни истаймиз. Лекин қийин бўлади. Боиси, биз мусобақа олдидан биргаликда шуғулланмадик. Йигитлар масъулиятни ҳис қилишмоқда. Уларнинг барчаси ҳозир тонусда, майдонда бир-бирларини яхши тушунишади. Энг асосийси, биз Қозоғистон шарафини ҳимоя қиламиз. Футзалчилар шижоат билан ўйнашмоқда. Ҳаммаси яхши бўлади. Асосийси, биз ҳеч кимдан қўрқмаймиз. Олдимизда Европа чемпионатининг саралаш баҳслари турибди. Мазкур мусобақада ўзини кўрсатган ўйинчилар заявкага киришади. Уларда бошқа имконият бўлмайди", - дейди Какау.

Эслатиб ўтамиз, Ўзбекистон-Қозоғистон ўйини бугун 18:30да "Ўзбекистон" спорт мажмуасида бошланади. Мухлисларни ўйинга таклиф қиламиз.