Шуҳрат Мақсудов бош мураббийлигидаги жамоаси U-23 терма жамоаси Осиё чемпионати саралашида Бангладеш, Сурия ва Ҳиндистонга қарши ўйнайди.

Бугун Малайзия пойтахти Куала-Лумпур шаҳрида 2016 йилги U-23 Осиё Чемпионати саралаш баҳсларига қуръа ташланди. Унга кўра Ўзбекистон U-23 терма жамоаси саралашнинг «Е» гуруҳида Сурия, Ҳиндистон ва Бангладешга қарши баҳс олиб боради. Саралашнинг ушбу гуруҳ ўйинларига эса 23-31 март кунлари Бангладеш мамлакати мезбонлик қилади.

Саралаш ўйинлари регламентга кўра, гуруҳ ғолиблари ва 2-ўринни эгаллаган жамоалар ичида энг яхши кўрсаткичга эга 5та жамоа Осиё Чемпионати-2016 финал босқичига йўлланма оладилар. 2016 йилги U-23 Осиё Чемпионати мезбони Қатар эса саралаш баҳсларидандан озод қилинган.

Маълумот ўрнида, 2016 йилда Қатарда ўтказиладиган U-23 Осиё Чемпионати шу йили Бразилиянинг Рио де-Жанейро шаҳри мезбонлик қиладиган Олимпиада ўйинларига ҳам саралаш вазифасини ўтайди.