Қатардаги футбол бўйича 2022 йилги жаҳон чемпионати объектлари қурилишида ҳозирнинг ўзида 400дан ортиқ киши, асосан, Ҳиндистон, Бангладеш, Шри-Ланка ва Непал фуқаролари ҳалок бўлган. Бу ҳақда Непалнинг “Pravasi Nepali Co-ordination Committee” ҳуқуқни ҳимоя қилиш ташкилоти хабар бермоқда.
“Компьютерра”нинг қайд этишича, Қатардаги қурилишларда меҳнат муҳожирлари мамлакатнинг иссиқ иқлими ва меҳнат фаолияти учун тегишли шарт-шароитлар яратилмаганидан ҳалок бўлишмоқда. Шу муносабат билан, “1Week1Project”нинг бир гуруҳ жонбозлари барча ҳалок бўлганларнинг хотирасига ёдгорлик ўрнатиш ғоясини таклиф этишди.
Ғоя бўйича, бу ёдгорлик рақамланган бўлаклардан қурилган осмонўпар бино кўринишида бўлади. Бўлаклар рақамланиб, ҳар бир ҳалок бўлган ишчи хотирасига қўйилади.
Бўлаклар зиналар билан боғланиб, ёдгорлик ичида бу қурилишни исталган вақтда юқорига давом эттириш учун мўлжалланган кранлар бўлади. Учинчи мамлакатлардан келган ишчиларнинг ҳамон ҳалок бўлаётганларининг белгиси сифатида бинонинг умуман томи бўлмайди.
Ушбу лойиҳа, катта эҳтимол билан, ҳеч қачон амалга оширилмайди ва концепт кўринишида қолиб кетади. Бироқ у ўзининг энг асосий мақсади – жамоатчилик, хусусан, ФИФА эътиборини муаммога қаратиш уддасидан чиқиб улгурди.
