Кеча Японияда Император Кубогининг финал баҳси бўлиб ўтди. Унда “Гамба Осака” ва “Ямагата” жамоалари куч синашишди. Ушбу учрашувни стадиондан туриб кузатган Япония терма жамоаси бош мураббийи Хавьер Агирре танаффус чоғида ОАВ вакилларига қисқача интервью бериб ўтди. У яқинлашаётган Осиё Кубоги ҳақида фикр билдираркан:
«Осиё кубоги ярим финалида бизга Жанубий Корея, Ўзбекистон ва Австралия каби жамоалар шериклик қилишади, деб ўйлайман», деб айтган.
Япония терма жамоаси 1992, 2000, 2004, 2011 йилларда ташкил этилган Осиё кубокларида мусобақа ғолибига айланган. Хавьер Агирре:
«Биз бу сафар ҳам мусобақа ғолиблигини қўлга киритиб, япон халқига қувонч улашмоқчимиз», деган.
Жанубий Кореянинг «Спортс Сеул» нашри ёзишича, Япония терма жамоаси Осиё кубоги гуруҳ босқичидаги рақибларини ўрганишни фаол олиб бормоқда. Жумладан, ўтган ой Саудия Арабистонида ташкиллаштирилган Кўрфаз Кубогига ўз «айғоқчилари»ни ҳам юборган. Хавьер Агирре 15 декабрь куни Япония терма жамоасининг Осиё Кубогида қатнашадиган таркибини эълон қилиши кутилмоқда.
Отабек Йўлдошев
Жанубий Корея, Сеул
