Бир йиллик танаффусдан сўнг ярим ҳимоячи Руслан Вагапов яна бекободликлар таркибига қайтишни ихтиёр этди. Ўтган йилги чемпионатда навоийликлар сафида энг кўп ўйин ўтказган ва майдонда энг кўп дақиқа тўп сурган Вагапов айни пайтда қадрдон жамоаси “Металлург” таркибида тайёргарлик машғулотларида иштирок этяпти.
Вагапов “Қизилқум” сафида ўтган йили 26 ўйинда 2203 дақиқа ўйнаганди. Шу ўринда 2013 йили Руслан “Металлург” таркибида 22 та учрашувда майдонга чиқиб, 1966 дақиқа ўйнаганлигини қиёсан эслаб ўтиш мумкин. Олий лига ярим ҳимоячилари орасида маҳорати ва тезкорлиги билан ажралиб турувчи Вагапов бекободликлар таркибини кучайтириш аниқ.
Мавсумга ҳозирлик кўраётган янги номлар орасида шунингдек Аюбхон Нўъмоновнинг ҳам борлигини айтиб ўтиш лозим. Улардан ташқари 2014 йилги мавсумда ёшлар таркибида ўзини кўрсатган қатор футболчилар ҳам икки маҳаллик машғулотларда ўзларини кўрсатишга уринишаяпти. Бироқ кимлар билан шартнома имзоланади, буни вақт кўрсатади.
“Металлург”нинг дастлабки йиғини Чирчиқ шаҳрида 29 декабрга қадар давом этади.
