“Реал” етакчиси Криштиану Роналду Марокашдан тўғри уйига ўтди. Жаҳон чемпионлигини қўлга киритган футболчининг уйи эса узоқ эмас. Туғилиб ўсган Мадейрада унга ҳайкал ўрнатилди.
Баландлиги 2,4 метр бўлган мазкур ҳайкалнинг очилиш маросимида футболчининг шахсан ўзи ҳам иштирок этди.
- Ушбу тантанада иштирок этиш – мен учун шараф. Аммо ростини айтишим лозим, ўзим аслида тирик инсонларга ҳайкал қўйилишини унчалик хушламайман. Аммо ҳозир фахр туйғусини ҳис этяпман, - дейди футболчининг ўзи мазкур маросимда нутқ сўзлаётган пайт.
Дунёнинг энг яхши футболчиси - Криштиану Роналду туғилган жойни биласизми? Бу саволга кўпчилик “ҳа, бу Португалиядаги Мадейра шаҳри”, деб жавоб бериши табиий. Лекин, ўша Мадейранинг қаерда жойлашгани, қандай шаҳар эканлиги кўпчиликка маълум бўлмаса керак.
Португалия бу - Европанинг энг ғарбий соҳилларида жойлашган, атрофини Атлантика океани ва Испания ўраб олган кичик бир мамлакат. Мадейра эса расман Лиссабонга бўйсунадиган, амалда португалия соҳилларидан 1000 километр олисда жойлашган оролдир. Расман олганда Португалиянинг Атлантика океанидаги архипелагларда жойлашган Мадейра мухтор ҳудуди ҳисобланади.
Агарда жўғрофий хариталарга назар ташласангиз мазкур ороллар тизимининг Африка қитъасига тегишли экани ойдинлашади. Эйсебио каби португал футболи афсонасининг аслида африкалик эканини эслайдиган бўлсак, Криштиану Роналдуни ҳам “қора қитъа” замини фарзанди, десак муболаға бўлмайди.
Мадейра Португалиядан 1000 км, Африка қирғоқларидан эса 500 км узоқликда жойлашган оролдир. Архипелагда Мадейра ва Порту-Санту каби икки йирик шаҳар жой олган. 1418 йилда мазкур ороллар португал денгизчилари томонидан очилган ва ўша пайтда кўчиб келганларнинг авлодлари бугунга келиб 267 минг кишидан ортган.
Мадейрада спортни жуда севишади. Асосан спорт турлари кўчада ривожланган. Футбол эса оролликларнинг энг севимли тури ҳисобланади. Чорак миллион аҳолига эга бўлган кичик орол Португалия чемпионати олий лигасининг икки етакчи клуби - «Маритиму» ва «Насьонал»га мезбонлик қилади. Илгари бу ерда учта клуб фаолият олиб борганди. 1995 йилда «Унион ду Мадейра» олий лигадан тушиб кетиб, кучлилар сафига қайтмади.
Мадейра номини дунёга таратган энг буюк инсон бу - шубҳасиз Криштиану Роналдудир. Мадриднинг «Реал» клуби ва Португалия терма жамоаси етакчиси ушбу шаҳарда туғилиб «Насьонал» академиясида футбол сирларини ўрганди. Сўнгра уни «Спортинг»га олиб кетишганди.
«Маритиму» эса УЕФА миқёсидаги мусобақаларда оролликлар орасида энг кўп иштирок этган. 2009-2010 йилги мавсумда мазкур клуб мухлислари «Ювентус», «Лидс Юнайтед» ва «Рейнжерс» каби жамоаларнинг ўйинларига гувоҳ бўлишди.
«Маритиму» тарбияланувчилари орасида «Зенит» футболчиси Данни, Мадриднинг «Реал»ида ўйнаётган Пепе, «Порту»даги ўйинлари билан шуҳрат қозонган Жорже Кошта, «Эвертон»да ўйнаган Нуну Валенте каби футболчиларни санаш мумкин. Буларнинг барчаси Португалия терма жамоасида фаолият олиб боришган.
«Насьонал» ҳам фаолияти давомида икки бор Португалия чемпионатида кучли тўртликка кириб Европа лигаси мусобақаларида қатнашган. Шунингдек, Мадейранинг яна икки клуби учинчи, бир клуби эса иккинчи дивизионда ўйнайди.
Мадейралик баскетболчилар, айниқса айллар жамоалари бир неча бор мамлакат чемпионатида ғалаба қозонишди, Евролига ва ФИБАнинг чақириқ кубоги турнирларида қатнашди.
2001 йилда Мадейрада Сёрфинг бўйича жаҳон чемпионати ўтказилди. Мадейрада битта гандбол клуби бор, лекин, у Португалияда ҳамма вақт етакчи ҳисобланган.
Шаҳарда сайёҳлик жуда яхши ривожланган, парапланда учиб оролнинг диққатга сазовор жойларини томоша қилиш кишига завқ бағишлайди.
Йил ўн икки ой бу ерда ёз, қуёш доимо чарақлаб туради, пейзаж ажойиб. Шаҳарда ралли, гольф ва картинг кенг оммалашган. Балиқ ови, дайвинг кабилар билан шуғулланадиганлар учун бу ер энг маъқул жой.
