Шу кунларда “Қизилқум” жамоаси Навоийда янги мавсум олдидан дастлабки босқич ўқув-машғулотлар йиғинини давом эттирмоқда.

“Сўғдиёна” стадионида кунига икки маҳалдан уюштирилаётган машғулотларда ўттиз нафардан ортиқ маҳаллий футболчилар қатнашяпти. Кончилар ҳужумчиси Наврўзбек Алимовнинг Тошкентнинг “Пахтакор” жамоаси билан шартнома тузганлигини хабар қилгандик. Охирги маълумотларга қараганда, айни пайтда ярим ҳимоячилар Руслан Вагапов Бекободнинг “Металлург”, Самандар Шодмонов эса Ғузорнинг “Шўртан” жамоаси ўқув-машғулот йиғинларида иштирок этишяпти.

Режага кўра, “Қизилқум” футболчилари дастлабки ўқув-машғулот йиғини доирасида битта назорат учрашуви ўтказишни мўлжаллашган. 27 декабрь куни Навоийда бўладиган мазкур ўйинда кончилар “Бухоро” вакиллари билан ўзаро куч синашади. Учрашув “Сўғдиёна” стадионида соат 12.00 да бошланади.