Юртимизга 2015 йил эшик қоқиб келди. Кириб келган янги йил билан барчани муборакбод этамиз.

Осиё футбол оммаси яна 9 кундан кейин старт оладиган қитъа чемпионати билан янги йилни бошлаб олишади. Йил жуда қайноқ ва қизғин бошланади. Осиё кубоги-2015 шундай мусобақаки, у ўзбек футболининг кейинги 4 йиллик тақдирини белгилаб беради. Тан олиш керак, бундан 4 йил олдинги Осиё кубоги-2011 ҳиссиётлари, таассуротлари ва унинг инерцияси билан шу кунгача етиб келдик. Демак, Австралиядаги мусобақаги муваффақият бизни янада ривожланишга ундайди.

Бошланган йилда 20 ёшгача бўлган ёшларимиз Жаҳон чемпионатида иштирок этади. Тўрт нафар клубимиз Осиё чемпионлар лигасида ўз иштирокларини бошлашади. 2015 йилда спорт ва футбол оламида у қадар мусобақалар кўп бўлмаса-да, ушбу йил футболимиз учун фундамент яратиш йили бўлади. ЖЧ-2018 саралаши бошланиши олдидан яратилажак фундамент ҳақида гапиряпмиз. Ушбу йилда қанчалик самарали меҳнат қилсак, келаси йилларда бизга шунчалик осон бўлади.

Stadion.uz ўз фаолиятини йўлга қўйганига ҳам 3 йил бўлди. Ўз навбатида биз — сайт ижодкорлари ҳам босқичма-босқич ривожланиб боришга, янада кенгроқ ва самаралироқ ишлашга ҳаракат қиламиз. Боримизни "дастурхон"имизга, стадионимизга қўямиз.

Фурсатдан фойдаланиб, барча ўзбекистонликларни, юртдошларимизни, футболимизга бефарқ бўлмаган инсонларни яна бир марта янги йил билан табриклаб, ҳаммага яна янги йилда соғлик-саломат тилаймиз. Ўзбек футболи ютуқларини биргаликда нишонлаш насиб этсин! Биз бирга бўлганингиз, бўлаётганингиз учун ташаккур!