Эрон терма жамоаси ҳимоячиси Ҳошим Бейкзода жароҳат олгани боис Осиё кубогини тарк этадиган бўлди. Чоршанба куни ўтказилган машғулот чоғида 30 ёшли марказий ҳимоячи қўлини синдириб олди.

"Афсуски, Бейкзода яна жароҳат олди. У ЖЧ-2014 олдидан ҳам жароҳат олиб, Мундиалда иштирок эта олмаганди, энди эса Осиё кубогини ҳам ўтказиб юборади. Биз учун бу катта йўқотиш. Боиси Пежман Мунтазорий ҳам жароҳатланганди. Асосий таркибнинг икки ҳимоячиси бизга ёрдам бера олмайди.

Ҳошим бахстиз тасодиф қурбонига айланди. У бир футболчининг футболкасидан ушлаб турганди. Кутилмаганда қўлини қайириб олди. Жуда ёмон бўлди", - дейди Карлос Кейруш.

Бейкзоданинг ўрнига "Сепаҳон" ҳимоячиси Муҳаммад Хонзода Осиё кубогига таклиф этилди (регламентга кўра, чемпионат бошланишига 1 сутка қолганида бир нафар жароҳатланган футболчини алмаштириш мумкин). 23 ёшли футболчи жума куни Австралияга етиб боради.

Эрон терма жамоаси Осиё кубогидаги дастлабки ўйинни Баҳрайнга қарши ўтказади.