Сизга яхши маълумки, ҳар бир терма жамоанинг матбуот хизмати фаолият кўрсатади. Жумаладан, Ўзбекистон терма жамоасининг матбуот котиби ва таржимонлик лавозимида ёш истеъдодли журналист Бахтиёр Маметов фаолият кўрсатмоқда. Биз фурсатдан фойдаланиб Бахтиёр билан қисқача суҳбатда бўлдик.

— Айтингчи, жамоамиз иккинчи турга қандай руҳда тайёргарлик кўришмоқда, айниқса, ёш футболчиларимиз ҳақида тўхталиб ўтсангиз, зеро сиз эртаю кеч улар билан ҳамнафассиз...

— Дастлабки турдан сўнг футболчиларимизнинг руҳий ҳолатлари яхши, яъни улар энди фақатгина чоршанба кунги ўйин ҳақида ўйлашмоқда. Сизга яхши маълумки, Хитой термаси сўнгги йилларда катта прогрессга эришган жамоалардан ҳисобланади. Ёшларимиз ҳам катталардан фарқли томонларини сезмаяпман. Бир сўз билан айтганда барчаси режадагидек кетмоқда. Франциялик тажрибали мутахассис Алан Перрин раҳбарлигидаги жамоага қарши бизнинг жуда оғир йин кутиб турибди. Гувоҳи бўлаётганингиздек, терма жамоамиз шунга мос тарзда масъулият билан машғулотларни олиб боришмоқда.

— Сизнингча, Хитой термасининг устун тамонлари нимада?
— Тўғриси, уларнинг биздан устун томонларини кўрмаяпман, улардан кам томонимиз йўқ. Хитойликлар ҳам айнан биз каби европача футбол намойиш этишга одатланишмоқда. Фақатгина улар биринчи турда ҳам шу Брисбендаги ўйингоҳда ўйнашгани бироз қўл келиши мумкин. Ғалаба учун имокниятлар тенг бўлсада, биз футболчиларимизга ишонамиз.

А.Абдуҳамитов, М.Риазев, Сидней шаҳридан