Ўзбекистон ва Хитой терма жамоалари ўртасидаги Осиё кубоги "В" гуруҳининг 2-тур баҳси Тошкент вақти билан 14:00да бошланади. Мусобақа расмий сайти ушбу ўйин олдидан айрим рақамларни тақдим этди.

Ўзбекистон ва Хитой терма жамоалари 1-турда ғалаба қозонишди. Бугунги ўйин гуруҳ ғолиблиги учун кураш ҳисобланади. Хитой аввалги 2та Осиё кубогида (2007, 2011) гуруҳ босқичидан чиқа олмаган, демак, улар бу ишни амалга оширишга ҳаракат қилишади. Ўзбекистон эса Қатар-2011да ярим финалгача етиб борган ва бу сафар ушбу натижани яхшилаш ниятида.

— Игорь Сергеев Ўзбекистон терма жамоаси сафида сўнгги 5та (ўртоқлик ўйинлари билан бирга) ўйинда 4та гол уришга муваффақ бўлган.

— Ўзбекистон Осиё кубогидаги сўнгги 15та ўйинидан фақат биттасида гол ура олмаган. Қолган барчасида майдонни голсиз тарк этмаган.

— Ўзбекистон Осиё кубоги-2015нинг дастлабки ўйинида берган зарбалари сони (16та) гуруҳнинг қолган 3 жамоасининг 1-турдаги зарбалари сонидан (12та) кўпроқ.

— Хитой Осиё кубоги доирасида Ўзбекистонни ҳали мағлуб этмаган (1та дуранг, 2та мағлубият).

— Ю Хай сўнгги 2та Осиё кубогида гол уришга муваффақ бўлмоқда. Тўрт йил олдинги турнирда у ўзининг биринчи голини Ўзбекистон дарвозасига урганди.

— Ўзбекистон Осиё кубогидаги Хитойга қарши аввалги 3та ўйинларда камида 2тадан гол урмоқда.