ФИФА шу йилнинг охирига қадар Қатарда бўлиб ўтадиган футбол бўйича жаҳон чемпионати нечта майдонда ўтказилишини аниқлаштириб олади. Қатар пойтахти Доҳада жаҳон чемпионатини намойиш қилиш маросимида журналистларга шундай хабар берилди.
Ҳозирги пайтда Қатарда фақатгина битта – “Халифа” стадиони тайёр бўлган.
“Мусобақа нечта – саккизта ёки ўн иккита стадионда ўтказилиши жуда муҳим эмас. ФИФА йилнинг охиригача стадионлар сонини аниқлаштиради”, деб айтиб ўтди ФИФА ходимларидан бири.
Чемпионатни ташкиллаштириш қўмитасида таъкидланишича, ўйинлар ўтказиладиган барча стадионлар 2018 йилнинг охирига қадар фойдаланишга топширилади. Бироқ ФИФА томонидан стадионларга қўйиладиган талаблар ўзгарган вазиятда қурилиш муддатлари ҳам ўзгартирилиши мумкин.
ФИФА мусобақани Қатарда ёз фаслида ноқулай об-ҳаво шароити туфайли қиш фаслида ўтказилиши мумкинлигини таъкидлаб ўтган эди. ЖЧ ўтказилиш муддатларига 2015 йилнинг ўрталарида аниқлик киритилиши кутилмоқда.
