Бразилиянинг “Фламенго” футбол клуби ишқибозлари “Макаэ”га қарши Рио-де-Жанейро штати чемпионати учрашуви арафасида рақиб кийим алмаштириш хонасига бостириб киришди ва дарвозабон Рикардо Бернага ҳужум қилишди, дея хабар бермоқда Associated Press.
Манбанинг маълумотларига кўра, дўппослаш натижасида дарвозабон бир қанча кичик жароҳатлар олган. Ишқибозлар қўриқчиларни ғафлатда қолдириб, очиқ қолган дарвозалар орқали бостириб киришган.
Ҳужум қилган шахслар кийим алмаштириш хонасидан бутсалар ва бошқа буюмларни ўғирлаб чиқишган. Дарвозабоннинг қайд этишича, безорилар камида ўн киши бўлган.
Қайд этишларича, жабрланувчи дарвозабон фаолияти давомида “Фламенго”нинг ашаддий рақиби ҳисобланган “Флуминенсе” шарафини ҳам ҳимоя қилган.
Маълумот учун, “Фламенго” ва “Макаэ” ўртасидаги ўйин 0:0 ҳисобидаги дуранг билан тугаган, Берна эса 90 дақиқа давомида ўз жамоаси дарвозасини қўриқлаган.
