Хабарингиз бор, 25 февралдан ОЧЛ-2015 гуруҳ босқичидаги учрашувларга старт берилади. 17 февраль куни эса, гуруҳдаги жамоалар ўзларининг учинчи рақибларини билиб олишади.

Қаршининг “Насаф” клуби чемпионлар лигаси Ғарб минтақасининг “D” гуруҳидан жой олган 17 февраль куни бу гуруҳдаги тўртинчи иштирокчи номи маълум бўлади.

25 февраль куни “аждарлар” ўз майдонида Эроннинг “Тракторсози” клубини қабул қилса, кейинги икки турни эса сафарда ўтказишади. Яъни 3-4 март кунлари “D” гуруҳининг 2-тур учрашувлари бўлиб ўтса, 3-тур учрашувлари 17-18 март кунлари бўлиб ўтади. “Насаф” кейинги 2 ва 3-турларни сафарда ўтказади.

Демак, 2-турдаги “Насаф”нинг рақиби кўп эҳтимолларга кўра, Саудия Арабистони Жидда шаҳрининг “Ал-Аҳли” клуби бўлиши мумкин. 3-турда эса, БАА Дубай шаҳрининг “Ал-Аҳли” клубига қарши майдонга тушади.

“Насаф”нинг бир гуруҳ фаол мухлислари ОЧЛдаги ана шу иккала учрашувларда жамоага бевосита стадионда туриб мухлислик қилиш учун сафар тараддудларини ҳозирдан бошлаб юборишди.

Ушбу сафар ташкилотчилигини voha.uz маъмурларидан бири Зиёдулла Сафаров ўз зиммасига олган.

“Насаф”нинг сафардаги учрашувларида мухлислик қилишни хоҳловчи бошқа футбол ишқибозлари ҳам шу гуруҳга қўшилишлари мумкин. Эслатиб ўтамиз, барча тегишли сафар харажатлари хоҳловчиларнинг ўз ёнидан бўлади.

Сафар харажатлари миқдори, саналари ва ҳужжатларни расмийлатириш бўйича хоҳловчилар, Зиёдулла Сафаровга телефон орқали мана шу рақамга қўнғироқ қилишлари мумкин: +998 95 505 11 17.