"Зенит" клубининг собиқ бош мураббийи Лучано Спалетти ҳамда айни дамда Қатарнинг "Лаҳвия" клубини бошқараётган Микаэль Лаудруп Япония терма жамоаси бош мураббийлигига янги номзодлар сифатида тилга олинмоқдалар.

Эслатиб ўтамиз, Осиё Кубоги баҳсларидан сўнг Япония терма жамоаси бош мураббийи Хавьер Агирре Испаниядаги фаолияти давомида юзага келган келишилган ўйинлар билан боғлиқ муаммо туфайли истеъфога чиқарилган эди.

Япония Футбол Уюшмаси эса Агирренинг ўрнига бир қатор номзодларни кўриб чиқмоқда. Маълумот ўрнида, "Наполи" ҳамда "Интер" клублариинг собиқ бош мураббийи Вальтер Маццари, шунингдек Италия терма жамоасининг собиқ устози Чезаре Пранделли Япония терма жамоасидан тушган таклифни рад этишган эди.

Таъкидлаш жоиз, Япония Футбол Уюшмаси Спалетти ҳамда Лаудрупдан ташқари Испания терма жамоасининг собиқ бош мураббийи Хосе Антонио Камачо ва Португалия терма жамоаси собиқ бош мураббийи Паулу Бенту номзодларини ҳам кўриб чиқмоқда.