Ҳозирда Ла-Лиганинг иккинчи дивизиони – Сегундада иштирок этаётган “Мальорка” жамоаси раҳбарияти жамоа мураббийи Валерий Карпинни ўз лавозимидан озод этди. Бу ҳақда жамоа директори Мигель Анхель Надаль “AS” нашрига ахборот берган.

Жамоа Карпинни ўтган йилнинг куз фаслида истеъфога чиқармоқчи бўлган, бироқ жамоа раҳбарияти шартномани муддатидан олдин бекор қилганлик учун Карпинга 400 минг евро миқдорида тавон пули тўлаши керак эди. Аммо раҳбарият бунча пулни топа олмагач, буни амалга ошира олмаган.

“Мальорка” Карпин мурабийилигида 24 та ўйин ўтказиб, 7 та ғалаба, 6 та дуррангга эришган ва 11 маротаба мағлубиятга учраган. “Оролликлар” 22 та жамоадан тузилган Сегунда турнир жадвалида 22 очко жамғарган ҳолда 15-ўринда кетишмоқда. Сегунданинг уч етакчиси “Лас-Пальмас”, “Жирона” ва “Спортинг” жамоалари 47 очкодан жамғаришга муваффақ бўлишган. “Мальорка” Испания кубогида ҳам муваффақиятсиз иштирок этди, жамоа мусобақани илк босқичларидаёқ тарк этган.

Карпин жамоага 2014 йилнинг августидан мураббий этиб тайинланган эди. Бундан аввал у Москванинг “Спартак” жамоасини бошқарган.