ФИФА бугун миллий терма жамоаларнинг 2015 йил февраль ойидаги рейтингини эълон қилди. Январь ойида Осиё кубоги ва Африка миллатлар кубоги мусобақалари ўтказилгани боис жадвалда анча ўзгаришлар бўлган, аммо Ўзбекистон терма жамоаси ўз ўрнини ўзгатирмади.
Терма жамоамиз Осиё кубогида иккита ғалаба эришиб, икки марта ютқазди. Бундан ташқари, Осиё кубоги-2011 натижалари рейтингдан тўлиқ чиқиб кетди. Натижада ҳисобимиздаги очколар сони 29тага ошиб (493 балл), 71-ўринда қолдик.
Қитъа чемпионати бошланиши олдидан Осиёнинг 4-жамоаси бўлиб турган Ўзбекистон янги жадвалда 6-ўринга тушиб кетди. Бизни Австралия (63-ўрин, +37 кўтарилиш) ва Бирлашган Араб Амирликлари (66-ўрин, +14) терма жамоалари қувиб ўтишди. Хитой терма жамоаси эса 14 поғона кўтарилди ва 82-ўринга чиқиб олди.
Эрон терма жамоаси 10та поғона кўтарилиб, 41-ўрин билан Осиёнинг энг яхши жамоаси бўлиб турибди. Корея (54-ўрин) эса Япониядан (55) ўтиб кетиб, 2-ўринга чиқиб олди.
Германия терма жамоаси катта фарқ билан рейтингни бошқаришда давом этмоқда. Умуман олганда, дастлабки еттиликда ўзгариш бўлмади: Германия, Аргентина, Колумбия, Бельгия, Голландия, Бразилия, Португалия. Испания терма жамоаси эса бир поғона пастлаб, 10-ўринга жойлашган.
Бу галги рейтингда энг катта ўсишга эришга жамоалар: Экваториал Гвинея (+59), Австралия (+37), Ироқ (+20). Ливия (-35), Қатар (-17) ва Того (-13) термалари эса энг кўп "шўнғиган" жамоалар бўлишди.
Рейтингнинг тўлиқ кўриниши билан ФИФА расмий сайтида танишиб олишингиз мумкин.
