Шу кунларда янги мавсумга қизғин ҳозирлик кўраётган «Қизилқум» жамоаси аъзолари машғулотларни Навоий шаҳрида давом эттирмоқда, дея хабар бермоқда клуб расмий сайти.
Режага кўра, навоийликлар навбатдаги ўқув-машғулот йиғинини Туркиянинг Анталия шаҳрида ташкил этишади. Машғулотлар 18 февралдан 4 мартга қадар давом эттиши белгиланган. Мазкур йиғин доирасида кончилар Анталияда Украина, Руминия, Қозоғистон, Россия, Белоруссия ва Польша футбол клублари билан синов-назорат учрашувларида майдонга тушишади. Йиғинга мураббийлар штаби йигирма беш нафар футболчи билан йўл олишни режалаштирган.
Янги мавсум олдидан «Қизилқум» жамоасини ярим ҳимоячилар Самандар Шодмонов, Элдор Бойматов, Руслан Вагапов, ҳужумчи Наврўзбек Алимовлар тарк этганлигини хабар қилгандик. Айни пайтда жамоа машғулотларида украиналик ярим ҳимоячи Андрей Деркач («Машъал»), ҳужумчи Вячеслав Шевченко («Биркиркара», Мальта)лар иштирок этяпти. Шунингдек, ўтган мавсумда бошқа жамоаларда тўп сурган ҳужумчилар Баҳриддин Ваҳобов («Бухоро»), Феруз Бобоқулов, Хуршид Йўлдошев («Оқ-тепа»)лар ҳам кончилар таркибида кўрикдан ўтишяпти.
Эслатиб ўтамиз, «Қизилқум» жамоаси аъзолари 17 февраль куни пойтахтимизда тўпланади ва эртаси куни Туркияга сафар қиладилар.
