Янги Зеландияда бўлиб ўтадиган ёшлар ўртасидаги Жаҳон чемпионатига тайёргарлик кўраётган Ўзбекистон U-20 терма жамоаси март ойида Португалияда иккита ўртоқлик учрашувини ўтказиш бўйича келишувга эришди.
Унга кўра, Равшан Ҳайдаров бош мураббийлигидаги терма жамоа 25-30 март кунлари Португалиянинг Коимбра шаҳрида навбатдаги йиғинини ўтказади. Мазкур йиғин давомида эса, ўзбекистонлик ёшлар Португалия ҳамда Уругвай ёшлар терма жамоаларига қарши ўртоқлик учрашувларида майдонга тушадилар.
Дастлаб, 27 март куни Ўзбекистон U-20 ёшлари шу ёш тоифасида Европа вице-чемпиони Португалия U-20 терма жамоасига қарши майдонга тушсалар, 29 март куни жаҳон вице-чемпиони Уругвай терма жамоасига қарши ўртоқлик учрашувини ўтказадилар. Ҳар иккала ўйин ҳам Португалиянинг Коимбра шаҳрида бўлиб ўтади.
Эслатиб ўтамиз, Янги Зеландияда бўлиб ўтадиган U-20 ёшлар ўртасидаги Жаҳон чемпионати баҳслари 30 май куни старт олади. Қуръага кўра Ўзбекистон U-20 терма жамоаси "F" гуруҳида Германия, Фиджи ҳамда Гондурас ёшларига қарши баҳс олиб боради.
