1965 йилда тарих саҳифаларига муҳрланиб қолган, машҳур бокс жангини ўтказган афсонавий Муҳаммад Али ва унинг бу жангдаги рақиби Сонни Листоннинг чарм қўлқоплари Нью-Йоркдаги аукционда 956 минг долларга сотилди, деб хабар берди 22 февраль куни Associated Press ахборот агентлиги.
Боксчилар бу қўлқоплардан Мэн штатининг Льюистон шаҳрида ўтказилган ушбу реванш жангда фойдаланганлар. Али жанг бошлангандан кейин икки дақиқа ўтмасданоқ ўзининг рақибини нокаутга учратган ҳамда сўзсиз ғалабага эришган.
Агентликнинг айтишича, жангдан кейин бу икки жуфт қўлқопни учрашув ҳаками Жорж Руссо ўзида қолдирган. Бу қўлқоплар унинг уйида бир неча ўнлаб йил сақлаб келинган. Кейинроқ Руссо уларни калифорниялик коллекционерга сотиб юборган. Айнан шу коллекционер қўлқопларни сотувга қўйган. Бу қўлқоплар янги эгасининг номи маълум қилинмаган.
Маълумот учун, Муҳаммад Али бокс тарихидаги энг машҳур профессионал боксчилардан бири ҳисобланади. 1960 йилги Олимпия ўйинлари чемпиони, 1964-1966, 1974-1978 йилларда оғир вазн тоифасида мутлақ жаҳон чемпиони, беш маротаба “Йил боксчиси” ва “Ўн йиллик боксчиси” унвонлари соҳиби.
1974 йилда Sports Illustrated журнали талқини бўйича йилнинг энг яхши спортчиси, яна бошқа спорт нашрлари талқини бўйича “Аср спортчиси” деб тан олинган. Бокс фаолиятини тугатгандан сўнг ЮНИСЕФнинг кўнгилли элчиси бўлиб фаолият юритган (1998-2008 йй.). Али ўз бокс фаолиятида 61 та жанг ўтказиб, 56 тасида ғалаба қозонган (37 тасида нокаут билан).
