Осиё футбол конфедерацияси президенти Салмон бин Иброҳим ал Халифа бошчилик қилаётган “Қатар-2022” ишчи гуруҳининг Доҳада ўтказилган сўнгги йиғилишида ФИФАга 2022 йилги жаҳон чемпионатини ноябрь-декабрь оралиғида ўтказишни тавсия қилиш қарори қабул қилинди.

Бундан ташқари ишчи гуруҳ турнирнинг ўтказилиш муддатларини қисқартиришни маслаҳат бермоқда. Бу ҳақда ФИФА расмий сайтига таяниб championat.com хабар қилмоқда. Эслатиб ўтамиз, ЖЧ-2022ни ўтказиш муддати борасидаги муҳокамалар анчадан бери давом этмоқда, чунки июнь-июль ойларида Қатарда одатда 40 даража иссиқ бўлади.

Ишчи гуруҳ жаҳон чемпионатини 26 ноябрдан 23 декабргача ўтказишни тавсия қилмоқда. Европанинг кўплаб лигалари турнирни март-апрель ойларида ўтказишни ёқлаб чиқишганди, аммо 2 апрелдан бошланадиган Рамазон ойи туфайли бу вариант рад қилинди. Мусобақани январь-февраль ойларида ўтказиш таклифи эса қишки 4-22 февраль кунлари ўтказиладиган Олимпиада ўйинлари туфайли қабул қилинмади.

Якуний қарорни ФИФА ижроқўми Цюрихда ўтказиладиган 19-20 мартдаги йиғилишида қабул қилади.