Яна саноқли кунлардан сўнг, футбол бўйича Ўзбекистон XXIV миллий чемпионати олий лига учрашувларига старт берилади. Навоийнинг “Қизилқум” футболчилари дастлабки турни ўз майдонида ўтказади. 14 март куни навоийликлар Жиззахнинг “Сўғдиёна” жамоасини қабул қиладилар.
“Қизилқум” профессионал футбол клуби Матбуот хизмати вилоятда фаолият кўрсатувчи оммавий ахборот воситалари ва матбуот ходимларига қулайлик яратиш мақсадида аккредитация ишлари давом этаётганлигини маълум қилади. Журналистлар учун тақдим этиладиган махсус бейжиклар уларнинг “Қизилқум” жамоаси иштирокида ўтказиладиган мамлакат чемпионати ва Ўзбекистон кубоги учрашувларини бевосита стадионда ўзлари учун ажратилган жойдан кузатиш, матбуот анжуманларида иштирок этиш ҳуқуқини беради.
Аккредитация 13 март куни тўхтатилади.
Бунинг учун оммавий ахборот воситалари ва матбуот ходимлари ўзлари фаолият кўрсатадиган телеканал, радиоканал ҳамда таҳририят раҳбари имзоси билан “Қизилқум” ПФК ижрочи директори Ҳамиджон Актамов номига хат тақдим этишлари лозим. Хатга икки дона (3,5Х4,5 ҳажмда) сурат ва паспорт нусхасини илова қилишлари талаб қилинади.
Эслатиб ўтамиз, ОАВ ва матбуот ходимларининг ўйинлар чоғида стадионларга турли ташкилотлар томонидан тақдим этилган гувоҳномалар билан киришига рухсат этилмайди.
