Ўз вақтида мутлақ жаҳон чемпиони бўлган Майк Тайсон украиналик боксчи Василий Ломаченкони Шарқий Европанинг энг яхши боксчиси деб атади. Бу ҳақда “24 канал” телеканали хабар берди.

“Менинг собиқ мураббийим Кас Д’Амато ҳаёт бўлганда, бу йигитчани ёқтириб қолган бўларди. Унинг бошқалардан устун томони мустаҳкам ҳимоясидир “, деб фикр билдирган Тайсон.

“Темир Майк”нинг айтишича, ярим оғир вазн тоифасида иштирок этувчи WBO, WBA ва IBF версиялари бўйича чемпион, россиялик Сергея Ковалев ва ўрта вазн тоифасида иштирок этувчи WBC, IBO ва WBA версиялари бўйича чемпион, қозоғистонлик Геннадий Головкиннинг муваффақиятларига қарамасдан, Ломаченко Тайсоннинг Шарқий европалик боксчилар шахсий рейтингида 1-ўринда туради.

Ломаченко ўрта енгил (57,2 кг гача) вазн тоифасида Бутунжаҳон бокс ташкилоти (WBO) талқини бўйича жаҳон чемпиони ҳиобланади. 27 ёшли украиналик боксчи профессионал рингда уч маротаба ғалаба қозониб, бир марта мағлуб бўлган. Ҳаваскорлик боксида у 396 та жанг ўтказиб, улардан бор-йўғи биттасида ютқазиб қўйган. Боксчи, шунингдек, Пекин ва Лондон Олимпия ўйинларида иккита олтин медални қўлга киритган. Одесса вилоятида вояга етган боксчи айни вақтда Лос-Анжелесда яшайди.