O‘zbekistonlik yarim himoyachi Odil Ahmedov bugun "Oriat Dono" radiosida "Choy ustida" dasturi mehmoni bo‘lmoqda. Futbolchi Xitoy klubiga o‘tishi borasida o‘z fikrlarini bildirib o‘tdi.

"Haqiqatan ham hozirda Xitoy klublaridan takliflar bo‘lmoqda. Ammo men huquqiy jihatdan "Krasnodar"ga tegishliman. Bu boshqa jamoaga o‘tishimda "Krasnodar" klubi ko‘proq rol o‘ynaydi.

Oila a’zolarim va yaqinlarim bilan maslahatlashgan holda, bo‘layotgan taklif o‘zimga yoqsa, bu taklifni qabul qilaman.

Futbolda ba’zida o‘yinchi atmosferani almashtiri kerak bo‘ladi. O‘ylashimcha, shunday vaqt keldi.

Xitoy klubi taklif qilayotgan mablag‘ga har qanday jamoa o‘z o‘yinchisini sotishi mumkin.

Hali qaysi jamoaga o‘tishimni bilmayman. "Krasnodar" men qo‘yib yuboradimi yoki yo‘qmi, bu ham aniq emas. Agar hamma narsa menga bog‘liq bo‘lganida, men aniq fikr aytgan bo‘lardim. Transfer masalasi klubga, agentga va yana boshqa jihatlarga bog‘liq. Hamma narsa yanvarda hal bo‘lishi kerak.

Xitoy chempionatida asosan kuchli legionerlar evaziga kuchaymoqda. Bu tomonlama chempionat rivojlanib bormoqda. O‘ylaymanki, Xitoy chempionatiga o‘tsam, bu men uchun zarar bo‘lmaydi.

Besh yildan beri Yevropa ligasi musobaqasida ishtirok etib kelaman. Bu vaqt davomida Germaniya, Ispaniya, Fransiya klublaridan takliflar bo‘lgan. Lekin "Krasnodar" transfer borasida u klublar bilan kelisha olmagan. O‘zimga bog‘liq bo‘lganida, Yevropaning kuchli chempionatlariga yo‘l olgan bo‘lardim. O‘zimga ko‘proq Germaniya chempionati yoqadi", - dedi Odil Ahmedov.