«Krasnodar» va O‘zbekiston terma jamoasi futbolchisi Odil Ahmedov bugun rasman «SHanxay SIPG» klubi a’zosiga aylandi. Futbolchi nima uchun faoliyatini Xitoyda davom ettirishga qaror qilgani haqida fikr yuritdi.

«Menga nafaqat Xitoydan, balki Yevropadan ham takliflar bor edi. Men hammasini tosh-tarozuga qo‘yib ko‘rib, Xitoy klubi taklifini qabul qilishga qaror qildim. Boisi, bundan "Krasnodar"ga maksimal foyda bo‘ladi. Xitoy chempionatiga o‘tish — professional nuqtai nazardan ortga qadam deb o‘ylamayman. Sababi, hozirda bu chempionatda jahonning yetakchi futbolchilari o‘ynashmoqda hamda jamoalarni eng yaxshi murabbiylar boshqarishmoqda.

Jumladan, men qaror qabul qilishdan oldin Villash-Boash bilan gaplashdim. U menga jamoadagi vaziyat va mening klubdagi o‘rnimni to‘liq tushuntirib berdi. Mening "Shanxay SIPG"ga o‘tishim terma jamoaga ham yaxshi bo‘ladi. Murabbiylar shtabi mening o‘yinimni kuzatib borishadi.

Afsuski, jamoa bilan xayrlashishga ulgurmadim. Boisi, ta’til boshida klubdan jo‘nab ketgandim. Shartnoma imzolashdan oldin Sergey Galiskiy menga ko‘ng‘iroq qildi, bir-birimizga omad tiladik. Sergey Nikolayevich kabi insonlar Rossiya futboliga kerak, deb hisoblayman. U Rossiya futboli uchun ko‘p ish qilmoqda, mamlakat futboli haqida ko‘p qayg‘urmoqda. U o‘z jamoasi bilan Rossiya chempioni bo‘lishini tilayman. U bunga munosib», — deydi Ahmedov.