«Краснодар» ва Ўзбекистон терма жамоаси футболчиси Одил Аҳмедов бугун расман «Шанхай СИПГ» клуби аъзосига айланди. Футболчи нима учун фаолиятини Хитойда давом эттиришга қарор қилгани ҳақида фикр юритди.

«Менга нафақат Хитойдан, балки Европадан ҳам таклифлар бор эди. Мен ҳаммасини тош-тарозуга қўйиб кўриб, Хитой клуби таклифини қабул қилишга қарор қилдим. Боиси, бундан "Краснодар"га максимал фойда бўлади. Хитой чемпионатига ўтиш — профессионал нуқтаи назардан ортга қадам деб ўйламайман. Сабаби, ҳозирда бу чемпионатда жаҳоннинг етакчи футболчилари ўйнашмоқда ҳамда жамоаларни энг яхши мураббийлар бошқаришмоқда.

Жумладан, мен қарор қабул қилишдан олдин Виллаш-Боаш билан гаплашдим. У менга жамоадаги вазият ва менинг клубдаги ўрнимни тўлиқ тушунтириб берди. Менинг "Шанхай СИПГ"га ўтишим терма жамоага ҳам яхши бўлади. Мураббийлар штаби менинг ўйинимни кузатиб боришади.

Афсуски, жамоа билан хайрлашишга улгурмадим. Боиси, таътил бошида клубдан жўнаб кетгандим. Шартнома имзолашдан олдин Сергей Галицкий менга кўнғироқ қилди, бир-биримизга омад тиладик. Сергей Николаевич каби инсонлар Россия футболига керак, деб ҳисоблайман. У Россия футболи учун кўп иш қилмоқда, мамлакат футболи ҳақида кўп қайғурмоқда. У ўз жамоаси билан Россия чемпиони бўлишини тилайман. У бунга муносиб», — дейди Аҳмедов.