«Chelsi» bosh murabbiyi Antonio Konte Angliya chempionat doirasida «Tottenxem»ga qarshi bo‘lib o‘tgan o‘yin (0:2) borasida o‘z fikrlarini bildirib o‘tdi.

«Mag‘lubiyatdan hafsalamiz pir bo‘ldi. Ammo 13ta o‘yindan iborat g‘alabalar seriyasidan xursand bo‘lishimiz kerak. Angliya chempionatida bu narsaga erishish juda qiyin. Bugun biz kuchli raqibga yutqazdik, ammo «Tottenxem» o‘tgan mavsumda oxiriga qadar chempionlik uchun kurashganini unutmaslik kerak. Pochettino bir necha yil davomida jamoa bilan katta hajmdagi ishni amalga oshirdi va so‘nggi turga qadar YECHL yo‘llanmasi, hattoki chempionlik uchun kurashadigan jamoani shakllantira oldi.

Endi biz barchasini boshidan boshlashimiz va ishlashda davom etishimiz kerak. Bugungi mag‘lubiyat sentyabr oyidagi mag‘lubiyatlardan tubdan farq qiladi. U paytda biz yaxlit jamoa emasdik. Bugun esa yaxlit jamoa ekanimizni namoyish qildik. Bu muhim», – deydi Konte.