O‘zbekiston terma jamoasining JCH-2018 saralash bosqichidagi raqibi Qatar terma jamoasi 17 yanvar kuni Moldova terma jamoasiga qarshi o‘rtoqlik uchrashuvini o‘tkazadi.
Jahon chempionati saralash o‘yinlariga tayyorgarlik ko‘rayotgan Qatar terma jamoasi Moldova terma jamoasi bilan o‘rtoqlik o‘yinini o‘tkazish borasida kelishuvga erishdi. Unga ko‘ra, ikkala terma jamoa ishtirokidagi o‘yin 17 yanvar kuni Qatar poytaxti Doxa shahridagi "Jassim Bin Hamad" stadionida bo‘lib o‘tadi. Uchrashuv mahalliy vaqt bilan soat 18:00da boshlanadi.
O‘zbekiston terma jamoasining Jahon chempionati saralash bosqichidagi yana bir raqibi – Eron terma jamoasining bugun Marokashga qarshi o‘tkazilishi lozim bo‘lgan o‘rtoqlik uchrashuvi no’malum sabablarga ko‘ra qoldirilgan. Ayni damda, Karlush Keyrush bosh murabbiyligidagi Eron terma jamoasi saralash o‘yinlariga BAAning Dubay shahrida tayyorgarlik ko‘rayotgani haqida avvalroq xabar berilgan edi.
Eslatib o‘tamiz, Samvel Babayan bosh murabbiyligidagi O‘zbekiston milliy terma jamoasi ham rasmiy o‘yinlar oldidan bir qator o‘rtoqlik uchrashuvlarini o‘tkazish borasida kelishuvga erishgan. Unga ko‘ra, dastlab 23 yanvar kuni BAAdagi yig‘in doirasida Gruziya terma jamoasiga qarshi o‘rtoqlik o‘yini o‘tkazilsa, 12 fevral kuni Turkiyada Armaniston terma jamoasiga qarshi uchrashuv o‘tkaziladi.
