Toshkentda mavsumoldi tayyorgarligini o‘tkazayotgan «Navbahor» tarkibidagi yangi futbolchilar soni kun sayin ortib bormoqda.

Bugungi mashg‘ulotlarda jamoa safiga G‘iyos Komilov va Alisher Samatov qo‘shildi.

Komilov bir necha yillardan beri Muborakning «Mash’al» jamoasi sharafini himoya qilib kelayotgandi. Namangan futboli tarbiyalanuvchisi bo‘lmish Komilov jamoa markaziy himoyasini mustahkam bo‘lishiga yordam beradi.

Samatov uchun esa «Navbahor» begona jamoa emas. 2015 yilgi chempionatda Alisher aynan «Navbahor» sharafini himoya qilib, mahalliy muxlislar hurmatini qozongandi. «Neftchi»dagi bir yillik faoliyatini yakunlagan futbolchi yana «Navbahor» libosida maydonga tushishi mumkin.

Kechki payt jamoaning vaqtinchalik qarorgohida asli namanganlik bo‘lgan Tohir Usmonov ko‘rinish berdi. So‘nggi yillarda Argentinaning «Boka Xuniors» klubining ikkinchi tarkibida to‘p surgan futbolchi yaqinda OAVdagi chiqishlarida «Navbahor»dan taklif tushsa buni jon deb qabul qilishini aytib o‘tgandi. Murabbiylar Usmonovni ertaga “Olmaliq” jamoasiga qarshi bo‘lib o‘tadigan uchrashuvda sinovdan o‘tkazishlari mumkin.

Yangi haftadan tarkibga yana yangi futbolchilarni qo‘shilishi kutilmoqda.