Sandalsforgoalposts.com veb-sayti 2016 yildagi Osiyoning eng kuchli 100 nafar futbolchisidan iborat reyting tuzib chiqdi. Veb-sayt tahririyati ro‘yxatning ikkinchi qismini e’lon qildi. Unda 51-75-o‘rinlarni egallagan 25 nafar futbolchi joy olgan. E’tiborli tomoni, bu futbolchilar orasida 3 nafar o‘zbekistonlik o‘yinchi bor.

71-o‘rin. Aleksandr Lobanov, "Paxtakor", darvozabon
Reytingning 71-pog‘onasini O‘zbekiston terma jamoasi posboni Aleksandr Lobanov egallagan. U 2016 yil davomida O‘zbekiston terma jamoasi darvozasini 7ta rasmiy o‘yinda qo‘riqlab, ularning beshtasida darvoza daxlsizligini saqlab qolgan. Uning ishlari Eron chempionatida ("Persepolis") yurishmagach, avgust oyidan boshlab "Paxtakor"ga qaytdi.

57-o‘rin. Sardor Rashidov, "Al-Jaish", Qatar, yarim himoyachi
Sardor Qatar chempionatida o‘zining ilk mavsumini o‘tkazdi. Uning ishtiroki yomon chiqmadi, ammo terma jamoa safida u qadar samarali o‘yin namoyish qilmadi. Ayniqsa, uzoq davom etgan yozgi ta’tildan so‘ng u formasini tiklab olishi qiyin kechdi. O‘zbek futbolchisi yangi mavsumda "Al-Jaish" tarkibida 10ta gol urishga muvaffaq bo‘ldi. Rashidov "Jaish" tarkibida OCHLning yarim final bosqichigacha yetib bordi. Nashr o‘tgan yilgi reytingda Sardor Rashidovni 22-o‘ringa qo‘ygandi.

52-o‘rin. Vitaliy Denisov, "Lokomotiv", Rossiya, himoyachi
O‘zbekistonlik himoyachi o‘tgan yilgi reytingda 80-o‘rinda qayd etilgandi. Bu safar hamyurtimiz yuqoriroqqa joylashtirildi. Vitaliy Denisov o‘z klubida ham, O‘zbekiston terma jamoasida muhim futbolchi bo‘lib qolmoqda. U chap qanot himoyasini egallasa ham, doimo hujumga qo‘shilib turadi.

Eslatib o‘tamiz, Sandalsforgoalposts.com tomonidan tuzilgan reytingda "Lokomotiv" hujumchisi Temurxo‘ja Abduxoliqovga 88-o‘rinni egallagandi.