Zamonaviy futboldagi birinchi darajali taqqoslash Krishtianu Ronaldu va Lionel Messiga bog‘liq bo‘lib qolgani hech kimga sir emas. Jahonning turli burchaklarida jurnalistlar ko‘zga ko‘ringan mutaxassislar yoki futbolchilarga «KIM KUCHLI - MESSIMI YOKI RONALDU?» qabilida savol berishni shunchaki, yozilmagan qoidaga aylantirishdi, go‘yo. Tabiiyki, har ikkisining o‘ziga yarasha qo‘llab-quvvatlovchi «armiya»si bor. Ya’ni «Barselona» tomonidagilar uchun Leo tengsiz, «Real» tarafkashlari esa Krishni mutlaq zo‘r, deb bilishadi. E’tiborlisi, ikki jamoa futbolchilari ham bu bahs-munozaradan chetda emaslar. Deylik, «Barselona» afsonasi Xavi butun 2016 yil davomida Ronaldu haqida gapirishdan to‘xtamadi. «Krishtianu - omadsiz. Uning omadsizligi - Messi bilan bir davrda tug‘ilgani». Doimo olijanobligi bilan ajralib turgan faxriy futbolchiga tegishli «sara» fikrlardan biri shu. Eshitgandirsiz, kuzda ham Xavi va Krishtianu Ronaldu o‘rtasida «dahanaki jang» kuzatildi. Yil yakunida Ronaldu hisob bo‘yicha 4-«Oltin to‘p»ni yutgach, birozgina tingan «janjal» qayta jonlandi. Chunki Qatarda faoliyat olib borayotgan Xavi yana «til»ga kirdi: «HA, KRISHTIANU «OLTIN TO‘P»NI OLDI, AMMO FAQAT JAMOAVIY SOVRINLARI EVAZIGA. AYNI PAYT HAM ENG YAXSHI FUTBOLCHI - MESSI». Endi Kataloniya faxrining yil davomida «Real» yetakchisiga qanday baho berganini birrov eslaymiz va Ronalduning javob zarbasiga ham e’tibor qaratamiz.
2016 yil mart
- Futbolda 2ta o‘ta muhim jihat bor - jismoniy kuch va aql. Tan olaman, Ronaldu juda abjir. Faqat shunisi borki, Leo Messida ham jismoniy, ham aqliy tayyorgarlik yuqori darajada. Shuning uchun u kuchliroq. XAVI.
2016 yil aprel
- Krishtianu Ronaldu sheriklari bilan o‘zaro tushunib o‘ynashda uncha yaxshi emas. Shuning uchun Messi kuchliroq ekanligini ta’kidlagandim. Biroq Krishtianuni ahmoqqa chiqargan emasman aslo... XAVI
2016 yil sentyabr
- Faqat ahmoq kishigina Krishtianuning buyuk futbolchi ekanligini tan olmaydi. Biroq kelib-kelib, Messi bilan bir davrda tug‘ilgani ozgina omadi yurishmaganidan dalolat. Ularni faqat «Madrid»ga bog‘liq odamlargina tenglashtirishlari mumkin. XAVI.
2016 yil sentyabr
- Men internet tarmoqlarida eng ko‘p «qidiriladigan» futbolchiman. Ya’ni butun dunyoda men haqimda ma’lumot olishni istashadi. Xavi esa, Ronaldu haqida gapirib, shunchaki, o‘ziga e’tibor qaratishga urinyapti. Umuman, u barcha sovrinlarni yutgan, faqat «Oltin to‘p»ni emas. Mening hisobimda esa bunaqasidan 3ta bor. Xavi ayni payt Qatarda o‘ynayapti. Ochig‘i, hozir o‘ynashda davom etyaptimi-yo‘q - buni bilmayman hatto... Krishtianu RONALDU.
2016 yil oktyabr
- Krishtianu uni Messi bilan taqqoslab aytgan gaplarimni yaxshi qabul qilmadi. Endi unga nisbatan fikrim o‘zgardi. Xo‘sh, unga yetarli hurmat bilan yondashmabman. Lekin Ronalduning o‘zi-chi? Menga nisbatan hurmatni saqladimi? Bunga nima deysizlar? XAVI.
2016 yil dekabr
- Ronaldu atrofida yuz berayotgan voqealardan hayronman. Bu chindan ham, hayratlanarli. Axir gap qandaydir kosmik summa haqida ketyapti. Deylik, shaxsan men hech qachon soxta firmalar tuzish yoki shunga o‘xshash narsalar haqida hattoki, o‘ylamaganman ham... XAVI (Ronalduning soliq masalasidagi muammolari xususida).
2016 yil dekabr
- Hakamlar hay’ati sovrinlar soniga qarab qaror chiqardi. Avvalgi yillarda esa, «Oltin to‘p»ni eng yaxshi o‘yin uchun berishgandi. Qanday sovrinlar yutishi-yutmasligidan qat’iy nazar, Messi jahonning eng yaxshi futbolchisi, baribir. XAVI.
