2016 yilgi mavsumda “Lokomotiv”da muvaffaqiyatli o‘yin namoyish etib, O‘zbekiston chempioni bo‘lishiga va mamlakat kubogini qo‘lga kiritishiga ulkan hissa qo‘shgan yarim himoyachi Server Jeparov endi faoliyatini boshqa jamoada davom ettiradi.
Osiyoning eng mashhur yarim himoyachilaridan biri sanaladigan Server Jeparovga Eron jamoalaridan biri taklif bilan chiqdi va milliy terma jamoamiz a’zosi mazkur taklifni qabul qildi. Shu tariqa, Server “Lokomotiv”ni tark etadigan bo‘ldi.
Ta’kidlash joizki, Server Jeparov ortda qolgan 2016 yilgi mavsumda jamoamizning chin ma’nodagi yetakchilaridan biriga aylana oldi va “Loko”ning xalqaro va ichki maydonda muvaffaqiyat qozonishiga o‘zining salmoqli xissasini qo‘sha oldi. U barcha musobaqalarda 34 ta uchrashuv o‘tkazdi va 8 marta raqiblari darvozasini ishg‘ol etishga erishdi.
“Lokomotiv” jamoasi Server Jeparovning bundan keyingi faoliyatiga omad tilaydi va unga jamoaning muvaffaqiyatlariga qo‘shgan ulushi uchun minnatdorchilik bildiradi.
Xabarlarga ko‘ra, Jeparov Tehronning "Istiqlol" klubiga o‘tmoqda.
