Antaliyada yangi mavsum tayyorgarligini olib borayotgan "Nasaf" bugun navbatdagi nazorat uchrashuvini o‘tkazadi.

Bugun "Nasaf"ga Ruminiyaning Botoshani shahrining “Botoshani” klubi raqiblik qiladi. Uchrashuv bizning vaqt bilan 20:00da boshlanadi.

“Botoshani” klubi 2001 yili tashkil etilgan. Jamoani ruminyalik mutaxasis Leontin Grozavu boshqaradi. Uy o‘yinlarini Botoshani shahridagi “Munisipial” stadionida o‘tkazadi, sig‘imi 12000 o‘rin.

“Botoshani” 2003 - 2013 yillarda Ruminiya quyi ligasida faoliyat yuritgan. 2013 yildan esa Ruminiya Oliy divizionida ishtirok etib kelmoqda. 2014/15 yilgi mavsumni 8-o‘rinda tamomlagan mazkur klub, o‘zidan yuqorida bo‘lgan 4ta klubning UEFA lisenziyalash jarayonidan o‘ta olmagani uchun Evropa ligasida ishtirok etish huquqini qo‘lga kiritadi. 2015/16 yilgi mavsumda “Botoshani” Evropa ligasi saralashining 2 bosqichida Polshaning “Legiya” klubiga mag‘lub bo‘lib, ligadagi ishtirokini yakunlagan.

Jamoa safida mahalliy futbolchilar bilan birga braziliyalik, argentinalik, bolgariyalik va litvalik futbolchilar to‘p tepishadi.

Bugungi nazorat uchrashuvi Belek turizm markazining “Papillon Ayscha Hotel” mehmonxonasi futbol maydonida bo‘lib o‘tadi.