Bugun jamoamiz Antaliyadagi yig‘in mobaynida beshinchi nazorat uchrashuvini o‘tkazadi. Raqibimiz Lvov shahrining “Karpati” jamoasi bo‘ladi, deya xabar beradi "ajdarlar"ning rasmiy sayti.

“Karpati” klubi 1963 yilda tashkil etilgan bo‘lib, juda boy tarixga egadir. Jamoa 1969 yili sobiq ittifoq davrida quyi liga jamoalari ichida billur sovrinni qo‘lga kiritgani bilan nom taratgan. Klub shuningdek sobiq ittifoq davrida (9 mavsum) yuqori ligada ham ishtirok etgan. Shuningdek klub Ukraina premyer ligasining sovrindori va ikki marta mamlakat kubogi finalchisi hisoblanadi.

“Karpati” klubi hozirgacha Yevropa kubok egalari kubogi (2 marta), UYEFA kubogi (1 marta) va Yevropa ligasida (2 marta) ham ishtirok etgan.

Jamoaga ayni paytda belorussiyalik mutaxasis Oleg Dulub murabbiylik qilmoqda. Uy o‘yinlarini “Lvov Arena” stadionida o‘tkazadi, sig‘imi 34 915 o‘rin.

Ukraina chempionatida hozir davralar oralig‘idagi tanaffus payti. Ikkinchi davra uchrashuvlari fevral oyi oxirida boshlanadi. Lvovliklar jamoasi, 12ta jamoa ichida so‘nggi 12-o‘rinni egallab turibdi. Ular bor yo‘g‘i 5 ochko to‘plashgan xolos. Turnir jadvalini Doneskning “Shaxtyor” jamoasi boshqarib bormoqda. Ular hisobida 50 ochko bor.

“Karpati” jamoas tarkibida faqat mahalliy – ukrainalik futbolchilar faoliyat yuritishadi.

“Karpati” klubi UYEFA va Ukraina FF tomonidan, klub muxlislarining millatchiligi uchun bir necha marta moliyaviy jarimaga ham tortilgan.

Bugungi uchrashuv bizning vaqt bilan soat 19:00da boshlanadi. Uchrashuv “WOW Topkapi Palace” mehmonxonasi futbol maydonida bo‘lib o‘tadi.