O‘zbekiston milliy terma jamoasi JCH–2018 uchinchi saralash bosqichi ikkinchi davrasiga tayyorgarlik ko‘rish maqsadida BAAning Dubay shahriga uchib keldi.

Avval xabar berilganidek, BAAdagi yig‘in 21–24 yanvar kunlari bo‘lib o‘tadi. Terma jamoa bugunning o‘zida mashg‘ulotlarga kirishadi.

Amirliklardagi yig‘inda ishtirok etadigan futbolchilar tarkibida yana bir o‘zgarish yuz berdi. “Lokomotiv” himoyachisi Bobur Yo‘ldoshev klub yig‘inida jarohat olganligi sababli, uning o‘rniga “Paxtakor” a’zosi Akbar Ismatullayev taklif etildi.

Oldinroq yig‘inga taklif qilingan Temurxo‘ja Abduholiqov Qatarning “Al-Sayliya” klubi bilan, Server Jeparov esa Eronning “Istiqlol” jamoasi bilan shartnoma imzolab, legioner futbolchilarga aylangani va terma jamoa bosh murabbiyi Samvel Babayan ularning o‘rniga Dostonbek Hamdamov (“Bunyodkor”) va Vladimir Kozakni (“Paxtakor”) taklif qilgani haqida xabar berilgandi.

Mazkur yig‘in FIFA kunlariga to‘g‘ri kelmaganligi uchun legioner futbolchilar BAAdagi o‘quv-mashg‘ulotlariga taklif etilmaydi.

“Nasaf” jamoasi OCHL–2017 o‘tish bosqichida Bahraynning “Al-Hidd” klubiga qarshi 31 yanvar kuni bahs olib borishi va unga tayyorgarlik ko‘rishi sababli qarshiliklar tarkibidan yig‘inga futbolchilar jalb etilmadi.

Eslatib o‘tamiz, O‘zbekiston terma jamoasi yig‘in doirasida 22 yanvar kuni Daniya U-23 termasiga qarshi, 23 yanvar kuni esa Gruziya terma jamoasiga qarshi o‘rtoqlik o‘yinlarini o‘tkazadi.

Ma’lumot uchun, O‘zbekiston terma jamoasi JCH–2018 turniriga saralash boschiqi “A” guruhi 5-turidan keyin 9 ochko bilan uchinchi o‘rinda bormoqda. Eron 11 ochko bilan birinchi, Janubiy Koreya 10 ochko bilan ikkinchi pog‘onada bormoqda.