Madridning "Real" klubi Ispaniya kubogining chorak final bosqichidayoq musobaqadan chiqib ketishga majbur bo‘ldi.

"Santyago Bernabeu"da bo‘lib o‘tgan bahsda Zidan shogirdlari 1:2 hisobida imkoniyatni boy berishgani bois, javob uchrashuvida ular raqib darvozasini kamida 2 marta ishg‘ol qilishlari talab etilardi. Ular bu ishni uddalashdi, ammo... o‘z darvozalaridan ham ikkita gol o‘tkazib yuborishdi.

Birinchi bo‘lim so‘ngida Danilo o‘z darvozasiga gol kiritib qo‘yib, jamoasining ahvolini og‘irlashtirdi. O‘yinning 62-daqiqasida Ronaldu jarimadan chiroyli gol urib, hisobni tenglashtirdi. Oradan ko‘p o‘tmasdan Krishtianuda o‘ta qulay imkoniyat yuzaga keldi, ammo u 5 metr masofadan darvozaning bo‘sh qolgan qismini ishg‘ol qila olmadi — to‘p ustunga tegib qaytdi.

Madridlar ketma-ket hujum tashkil qilishdi, vaziyatlardan foydalana olishmadi. O‘yin tugashiga 5 daqiqa qolganida "Selta" futbolchisi Vass jamoasini hisobda oldinga olib chiqdi. To‘qnashuv taqdiri hal bo‘lgandek ko‘ringan vaziyatda Lukas Vaskes 90-daqiqada hisobni tenglashtirishga muvaffaq bo‘ldi. Qo‘shib berilgan 4 daqiqalik kompensasiya vaqti esa "Madrid" uchun kamlik qildi.

Shu tariqa, "Real" Ispaniya kubogi musobaqasi bilan xayrlashdi.

Ispaniya kubogi, chorak final, javob o‘yini
"SELTA" - "REAL MADRID" - 2:2 (1:0)
Gollar: 1:0 – 44, avtogol Danilo, 1:1 – 62 Ronaldu, 2:1 – 85 Vass, 2:2 – 90 Vaskes.
Selta – Alvares, Malyo, Kastro, Kabral, Ronkalya, Vass (Gomes, 88), Radoya, Dias, Bongonda, Aspas (Fontas, 90), Gvidetti (Xosabed, 84).
Real Madrid – Kasilya, Nacho, Ramos, Danilo, Kroos, Kovachich, Kazemiro (Dias, 89), Asensio (Vaskes, 76), Isko (Morata, 80), Benzema, Ronaldu.
Ogohlantirishlar: Malyo (35), Vass (54), Kastro (72), Danilo (75).
Birinchi o‘yin: 2:1