Kecha O‘zbekiston terma jamoasi va «Lokomotiv» klubining sobiq bosh murabbiyi Vadim Abramov «Buxoro» klubining infratuzilmasi bilan tanishdi. So‘ngra viloyat hokimi o‘rinbosari bilan kelajak rejalarini muhokama qildi.

Bugun esa vaziyat o‘zgargani va Abramov emas, balki Ulug‘bek Baqoyev bosh murabbiy qilib tayinlangani haqida xabarlar chiqdi. Shunisi qiziqki, PFL reglamentiga ko‘ra, murabbiylikning «A» lisenziyasiga ega bo‘lgan Ulug‘bek Baqoyev bosh murabbiy sifatida ro‘yxatdan o‘ta olmaydi. Abramovda esa bunday muammo yo‘q. «Pro» lisenziyasiga ega bo‘lgan Vadim Karlenovich istalgan jamoada bosh murabbiy bo‘la oladi va taxminimizcha aynan u «Buxoro» bosh murabbiyi sifatida ro‘yxatdan o‘tib, matbuot-anjumanlarida qatnashadi.

Klub haqidagi yangiliklarga to‘xtaladigan bo‘lsak, ayni paytda o‘tgan mavsumdan qolgan qarzlar uzilmagan. Shu tufayli ham bu yilgi byudjet kamtarona bo‘ladi va jamoa asosiy e’tiborini mahalliy yoshlarga qaratadi. Ular bilan ishlashda esa Abramov tajribali mutaxassislardan biridir.

Ertaga «Buxoro» Toshkentda o‘quv-mashg‘ulot yig‘inini boshlaydi. Murabbiylar shtabi seleksiya ishlarini boshlab yuborgan va tez orada jamoa safini to‘ldiradigan futbolchilar ma’lum bo‘ladi. Klub oldiga qo‘yilgan vazifalar esa o‘zgarmagan – Osiyo chempionlar ligasi yo‘llanmasini qo‘lga kiritish.