Кеча Ўзбекистон терма жамоаси ва «Локомотив» клубининг собиқ бош мураббийи Вадим Абрамов «Бухоро» клубининг инфратузилмаси билан танишди. Сўнгра вилоят ҳокими ўринбосари билан келажак режаларини муҳокама қилди.

Бугун эса вазият ўзгаргани ва Абрамов эмас, балки Улуғбек Бақоев бош мураббий қилиб тайинлангани ҳақида хабарлар чиқди. Шуниси қизиқки, ПФЛ регламентига кўра, мураббийликнинг «А» лицензиясига эга бўлган Улуғбек Бақоев бош мураббий сифатида рўйхатдан ўта олмайди. Абрамовда эса бундай муаммо йўқ. «Про» лицензиясига эга бўлган Вадим Карленович исталган жамоада бош мураббий бўла олади ва тахминимизча айнан у «Бухоро» бош мураббийи сифатида рўйхатдан ўтиб, матбуот-анжуманларида қатнашади.

Клуб ҳақидаги янгиликларга тўхталадиган бўлсак, айни пайтда ўтган мавсумдан қолган қарзлар узилмаган. Шу туфайли ҳам бу йилги бюджет камтарона бўлади ва жамоа асосий эътиборини маҳаллий ёшларга қаратади. Улар билан ишлашда эса Абрамов тажрибали мутахассислардан биридир.

Эртага «Бухоро» Тошкентда ўқув-машғулот йиғинини бошлайди. Мураббийлар штаби селекция ишларини бошлаб юборган ва тез орада жамоа сафини тўлдирадиган футболчилар маълум бўлади. Клуб олдига қўйилган вазифалар эса ўзгармаган – Осиё чемпионлар лигаси йўлланмасини қўлга киритиш.