Tojikistonda «Futbol» telekanali ishga tushadi. Mamlakat futbol federasiyasi qoshida ochilayotgan yangi telekanal haqida tashkilot matbuot xizmati xabar berdi.
Xabarda aytilishicha, Tojikiston prezidenti Emomali Rahmon 2017 yilni «Yoshlar yili» deb e’lon qilgan. Shundan kelib chiqib, mamlakat futbol federasiyasi yoshlar uchun atalgan yilda «Futbol» kanali ochishni rejalashtirgan.
Tez orada faoliyatini boshlaydigan telekanal faqatgina bitta sohani yoritishga ixtisoslashtirilgan Tojikistondagi ilk telekanal bo‘ladi va u zamonaviy talablar asosida faoliyat olib borib, HD formatda efir yuzini ko‘radi.
Yangi ochilayotgan «Futbol» kanali faqatgina Tojikiston milliy terma jamoasi ishtirokidagi o‘yinlar, mamlakat yuqori va quyi divizioni uchrashuvlarini yoritibgina qolmay, Osiyo miqyosidagi musobaqalarga ham e’tibor qaratadi hamda Osiyo Chempionlar ligasi, OFK kubogi, Osiyo chempionati kabi turnirlarni ham translyasiya qiladi. Unda, shuningdek, Yevropa Chempionlar ligasi va Yevropa ligasi, Angliya Premyer-ligasi, Ispaniya La ligasi, Italiya A seriyasi, Germaniya Bundesligasi va Fransiya chempionatlarini ham tomosha qilish mumkin, deb yozilgan federasiya xabarida.
Telekanal efirlari jahon darajasidagi yulduzlarga bag‘ishlangan ko‘rsatuvlar, klublar va terma jamoalar fonida tayyorlangan tahliliy dasturdar bilan boyitiladi. Ayni vaqtda «Futbol» kanalini ishga tushirish ishlari olib borilmoqda.
Ma’lumot uchun, bir hafta muqaddam O‘zbekistonda ham «Futbol-TV» kanali faoliyatini boshlash arafasida ekani borasida xabar chiqqandi. Mazkur kanal nimalarni qamrab olishiga esa oydinlik kiritilmagan. Aniq tomoni shuki, u O‘zbekiston futbol federasiyasi qoshida ochilmaydi.
