Shu kunlarda poytaxtimizda navbatdagi o‘quv-mashg‘ulot yig‘inini o‘tkazayotgan “Qizilqum” futbolchilari navbatdagi sinov nazorat uchrashuvida maydonga tushdi. 26 yanvar kuni “Bunyodkor” futbol klubi mashg‘ulotlar maydonida navoiyliklar Bekobodning “Metallurg” jamoasi bilan kuch sinashdi.
Ayni paytda “Qizilqum” jamoasining Toshkentdagi yig‘inida yigirma besh nafar futbolchi ishtirok etyapti. Yig‘in doirasida uyushtirilayotgan o‘yinlarda Hamidjon Aktamov boshchiligadiga murabbiylar shtabi tarkibni shakllantirish maqsadida nazorat uchrashuvlariga jiddiy e’tibor qaratishyapti. Bungacha konchilar bunyodkorchilar bilan o‘rtoqlik uchrashuvi (0:2) o‘tkazishgandi.
Bekobodliklarga qarshi kechgan bahsda murabbiylar quyidagi tarkiblarni maydonga tushirdilar:
"QIZILQUM": Umid Xonimqulov, Shukurali Po‘latov, Akmal Rustamov, Otabek Zokirov, Azamat Allaniyozov, Fayzulla Qambarov, Jasur Hasanov, Maksim Yurku, Ilhom Yunusov, Erkin Boydullayev, Azizbek Usmonov.
Zaxiradan maydonga tushganlar: Artyom Makosin, G‘ayrat Jumayev, Sherali Jo‘rayev, Alisher Yusupov, Mansurjon Saidov, Samandar Shodmonov, Bekzod G‘anijonov.
"METALLURG": Zafar Safoyev, Davron Karimqulov (Vusol Magerramov), Doston Tursunov (Kamron Kopadze), Hikmat Hoshimov (Jasur Ahmedov), Mirg‘iyos Sulaymonov (Nodir Yo‘ldoshev), Doniyor Odilov (Farhod Namozov), Jahongir Abdumo‘minov (Alisher Ziyovuddinov), Islom Isoqjonov (Muhammadodil Qahramonov), Sanjar Qodirqulov (Abror Toshqo‘ziyev), Dilmurod Karimov (Ayubxon No‘’monov), Zohid Abdullayev (Umid Rahimov).
Qiziqarli va hujumkor ruhda kechgan bahsda darvozalar daxlsizligi saqlanib qoldi — 0:0.
O‘tgan yilgi mavsumning ikkinchi yarmini “Qizilqum” tarkibida o‘tkazgan bolqonlik legioner Nemanya Yovanovich jamoani tark etganligini xabar qilgandik. Toshkent yig‘ini oldidan gruziyalik Georgiy Kvseiyeshvili ham boshqa jamoada o‘ynash istagi borligini bildirgandi. Konchilar ular o‘rniga munosib legioner futbolchilarni topish maqsadida bu borada ham seleksiya ishlarini olib borishyapti. Jumladan, bekobodliklarga qarshi o‘yinda navoiyliklari tarkibida moldovalik Maksim Yurku maydonga tushdi. Uning jamoada qolish-qolmasligi yig‘in yakunida aniq bo‘ladi.
Yana bir xabar. “Qizilqum” jamoasi mashg‘ulotlarida farg‘onalik tajribali yarim himoyachi Mansur Saidov qatnashayotganligini va yangi mavsumda navoiyliklar bilan shartnoma imzolashga yaqin turganligini bildirgandik. Kuni kecha oilaviy sharoiti munosabati bilan Mansur konchilar qarorgohini tark etdi.
Rejaga ko‘ra, “Qizilqum” navbatdagi nazorat uchrashuvini birinchi liga vakili Toshkentning “NBU-Osiyo” jamoasi bilan o‘tkazadi.
