Melburnda davom etayotgan Australian open musobaqasining erkaklar o‘rtasidagi ikkinchi finalchi nomi ham ma’lum bo‘ldi. 

Turnirning 9-tartib raqami ostida qayd qilingan Rafael Nadal bolgariyalik Grigor Dimitrov (15)ga qarshi kortga chiqdi. 4 soat 56 daqiqa davom etgan uchrashuvda ispaniyalik tennischi, besh setda g‘alaba qozondi — 6:3, 5:7, 7:6, 6:7, 6:4.

Ushbu g‘alabadan keyin Nadal 2014 yildagi «Rolan Garros»dan buyon ilk marta «Ulkan toj» turkumiga kiruvchi musobaqalar finaliga yo‘llanma oldi. Shuningdek bu Nadalning 4-marta Avstraliya ochiq chempionatidagi finali hisoblanadi. Umumiy hisobda u 21-marta «Katta dubulg‘a» turkumidagi turnirlar finalida ishtirok etishi bo‘ladi. 

Finalda Nadal o‘zining azaliy raqibi Rojer Federerga (17) qarshi kortga chiqadi. Federer kecha bo‘lib o‘tgan yarim final uchrashuvida vatandoshi Sten Vavrinkani besh setda mag‘lubiyatga uchratgandi. So‘nggi marta ikkala sportchi 2011 yilda «Rolan Garros» finalida o‘zaro to‘qnash kelishgandi.

Bu ikki sportchi shu kunga qadar 34 marta ro‘baro‘ kelgan bo‘lib, unda Nadal g‘alabalar soni bo‘yicha 23-11 hisobida ustun bo‘lib turibdi. «Ulkan toj» musobaqalarida bu ikki raqibning finaldagi 9-to‘qnashuvi bo‘ladi. Shu kungacha bu borada ham yaqqol ustunlik Nadal tarafida — 6-2.

Australian Open
Melburn, Avstraliya
Mukofot jamg‘armasi – 50 000 000 avstraliya dollari
Rafael Nadal (Ispaniya) – Grigor Dimitrov (Bolgariya) - 6:3, 5:7, 7:6, 6:7, 6:4.