Farg‘onada o‘tayotgan «Hokim Kubogi-2017» turnirida ishtirok etayotgan andijonliklar bugun taqvimga ko‘ra dam oladi.
Shu bois murabbiylar bugun Andijonda «AOZK» jamoasiga qarshi nazorat sinov uchrashuvini tashkil etib, ko‘rikda bo‘lib turgan yoshlarni yana bir bor ko‘zdan kechirdi va kerakli xulosaga ega bo‘ldi deyish mumkin. Sho‘rbuloq dahasidagi sun’iy qoplamali maydonda o‘tgan uchrashuvda nisbatan tajribali bo‘lgan «Andijon»ning qo‘li baland keldi. Lekin «AOZK» jamoasi ham osonlikcha taslim bo‘lmadi. Ayniqsa ikkinchi bo‘limda yetarlicha tashvish tug‘dira oldi.
Uchrashuvda «Andijon» 3:1 hisobida g‘alaba qozondi. Dastlab Akmal Ergashev hisobni ochgan bo‘lsa. Ikkinchi taymda Shukur Jumaboyev o‘z hisobiga gol yozdirib qo‘ydi. Uchinchi golga esa «Andijon» posboni Barakatillo Isroilov mualliflik qildi. O‘yinning ikkinchi bo‘limida «AOZK» darvozasini qo‘riqlagan ushbu darvozabon kutilmaganda to‘pni qaytarishda xatoga yo‘l qo‘yib, o‘z darvozasini ishg‘ol etib yubordi.
«Andijon»: Barakatillo Isroilov, Ahror O‘ktamov, Shoyad Mullajonov, Botir Xolliyev, Mansur Maqsudov, Avaz Olimjonov, Diyor Usmonxo‘jayev, Farruh Bekmuratov, Farruh Mirzayev, Bobur Farhodov, Akmal Ergashev.
Ikkinchi bo‘limda maydonga tushganlar: Davron Jo‘raqulov, Baxtiyor Qosimov, Abror Komilov, Shukur Jumaboyev, Alisher Abduvohidov, Jahongir Maqsudov.
Endi «Andijon» 2 fevral kuni Farg‘onada «Sementchi» jamoasiga qarshi kechadigan bahsga tayyorgarlik ko‘radi.
