Shu yilning 29 aprel kuni professional boksning IBF yo‘nalishida superog‘ir vazn toifasida chempion bo‘lgan britaniyalik Entoni Joshua o‘z kamarini sobiq jahon chempioni — ukrainalik Vladimir Klichkodan himoya qiladi. Jang Londondagi «Uembli» stadionida bo‘lib o‘tadi.
«Sports.ru» ma’lumotiga ko‘ra, Klichko hamda Entoni o‘rtasidagi jang uchun avvaliga 80 mingta chipta sotuvga chiqarilgandi. Biroq ular bir necha soat ichida sotib bo‘lindi. Natijada jang tashkilotchilariga yana 10 mingta qo‘shimcha joy tayyorlash vazifasi yuklatildi va «Uembli» arenasi rahbariyati ham bunga ko‘ndirildi.
Sotilgan chiptalarning eng arzoni 50 dollarni tashkil qilgan bo‘lsa, eng qimmati 2500 dollar edi. Shunga qaramay, 90 ming chiptaning bari sotib tugatildi.
Tashkilotchilar bundan tashqari jangni 150 ta mamlakatga translyasiya qiladi. Uning umumiy qiymati qanchani tashkil qilishiga aniqlik kiritilmagan.
