Шу йилнинг 29 апрель куни профессионал бокснинг IBF йўналишида супероғир вазн тоифасида чемпион бўлган британиялик Энтони Жошуа ўз камарини собиқ жаҳон чемпиони — украиналик Владимир Кличкодан ҳимоя қилади. Жанг Лондондаги «Уэмбли» стадионида бўлиб ўтади.
«Sports.ru» маълумотига кўра, Кличко ҳамда Энтони ўртасидаги жанг учун аввалига 80 мингта чипта сотувга чиқарилганди. Бироқ улар бир неча соат ичида сотиб бўлинди. Натижада жанг ташкилотчиларига яна 10 мингта қўшимча жой тайёрлаш вазифаси юклатилди ва «Уэмбли» аренаси раҳбарияти ҳам бунга кўндирилди.
Сотилган чипталарнинг энг арзони 50 долларни ташкил қилган бўлса, энг қиммати 2500 доллар эди. Шунга қарамай, 90 минг чиптанинг бари сотиб тугатилди.
Ташкилотчилар бундан ташқари жангни 150 та мамлакатга трансляция қилади. Унинг умумий қиймати қанчани ташкил қилишига аниқлик киритилмаган.
