Terma jamoalar o‘rtasida tennis bo‘yicha norasmiy jahon chempionati hisoblangan Devis kubogi musobaqasining 2017 yildagi ilk bosqichida O‘zbekiston terma jamoasi Janubiy Koreyani mag‘lub etishga muvaffaq bo‘ldi.
Osiyo/Okeaniya mintaqasida ishtirok etayotgan ushbu terma jamoalar o‘rtasidagi o‘yin Koreyada bo‘lib o‘tayotgan bo‘lib, dastlabki ikki kun natijalariga ko‘ra hamyurtlarimiz 2:1 hisobida oldinga chiqib olgandi.
Bugun musobaqada yana yakkaliklar o‘rtasida bahslar boshlandi. Dastlab O‘zbekistonning birinchi raketkasi Denis Istomin raqibning 1-raqamli tennischi Xyon Chungga qarshi kortga chiqishi kerak edi. Biroq koreyaliklar, Xyon Chung dastlabki 2 kun davomida 5ta setli o‘yinlarda ishtirok etgani uchun bo‘lsa kerak, uning o‘rniga jamoaning uchinchi tennischisi Sun Vu Kvonni qo‘yishga qaror qilishdi.
Ushbu tennischi birinchi setda Istominni mag‘lub etishga muvaffaq bo‘ldi — 6:3. Ikkinchi bo‘limda ham oldinda borayotgandi, biroq Denis qayta breykni amalga oshirdi va setni tay-brekkacha olib borib, unda 7-5 hisobida g‘alaba qozondi.
Uchinchi setda hamyurtimiz osongina g‘alaba qozondi — 6:2. To‘rtinchi setda Istomin breyk hisobiga oldinda borayotgandi. Ammo Sun Vu Kvon hisobni tenglashtirdi va bahs yana tay-brekkacha davom etdi. "Lotereya"da mezbon sportchisi osonlikcha "jon" berishni istamadi. U hamyurtimizning naq 5 marta matchboldan foydalanishiga yo‘l qo‘ymadi. Nihoyat, Istomin oltinchi imkoniyatdan samarali foydalandi — 14:12!
Natijada set, match va to‘qnashuv taqdiri hal bo‘ldi. Janubiy Koreya - O‘zbekiston - 1:3.
Bugun Duk Xi Li va Sanjar Fayziyev o‘rtasidagi o‘yin bo‘lib o‘tishi rejalashtirilgan.
O‘zbekiston tennis terma jamoasi keyingi bosqichda Yangi Zelandiya - Hindiston juftligi g‘olibiga qarshi bahs olib boradi. Bu to‘qnashuv 7-9 aprel kunlari bo‘lib o‘tadi.
Devis kubogi. Osiyo/Okeaniya mintaqasi
Sun Vu Kvon - Denis Istomin - 1:3 (3-6, 6-7 (5), 2-6, 6-7 (12)).
